Policia e Kosovës ka njoftuar se ka arrestuar dy persona të dyshuar, pasi që të njëjtit kanë sulmuar një 23 vjeçar me mjete të forta duke e goditur në kokë dhe pjesë të ndryshme të trupit.
Sipas Policisë rasti ka ndodhur në rrugën “Dituria” në fshatin Paldenicë të Hanit të Elezit.
“Më 28.07.2026, rreth orës 21:25, në fshatin Paldenicë, Han i Elezit, është raportuar një rast rrahjeje ndërmjet disa personave. Sipas hetimeve fillestare, ngjarja lidhet me një konflikt të mëparshëm të ndodhur më 27.07.2026, për të cilin ishte iniciuar rast për veprën penale “Lëndim i lehtë trupor”. Sipas dëshmive të siguruara, më 28.07.2026, në rrugën “Dituria” në fshatin Paldenicë, dy të dyshuarit, F.K (22 vjeç). dhe F.K.,( 20 vjeç) kanë sulmuar viktimën (23 vjeçar) me mjete të forta, duke e goditur në kokë dhe pjesë të ndryshme të trupit, me ç’rast i kanë shkaktuar lëndime trupore dhe të dyshuarit janë larguar nga vendi i ngjarjes”.
Viktima fillimisht ka pranuar trajtim mjekësor në Qendrën e Mjekësisë Familjare në Han të Elezit, ndërsa më pas është dërguar për trajtim të mëtejshëm në Qendrën Emergjente në Ferizaj.
Me autorizim të prokurorit kujdestar është iniciuar rasti për veprën penale “Lëndim i lehtë trupor”, ndërsa dy të dyshuarit më pas janë arrestuar dhe janë dërguar në mbajtje për 48 orë, për procedura të mëtejme hetomore.