Policia e Kosovës ka arrestuar të shtunën një pjesëtar të Policisë së Serbisë në pikën kufitare në Jarinje.
Sipas raportit policor 24-orësh, në bagazhin e veturës së tij janë gjetur 51 fishekë dhe 9,900 euro të cilat i janë konfiskuar.
Me vendim të prokurorit, i dyshuari është dërguar në mbajtje dhe rasti është duke u hetuar.
“PKK Jarinje / 01.11.2025 – 10:02. Në vendkalimin kufitar në hyrje është arrestuar i dyshuari mashkull kosovar pjesëtar i policisë së Serbisë, për shkak se në veturën me targa të Beogradit të cilën ishte duke e drejtuar gjatë kontrollit në bagazhi janë gjetur dhe konfiskuar 51 fishek, 9.900 euro para të gatshme dhe 26.000 dinar serb. Nga i dyshuari janë sekuestruar dokumente personale si kartela e identifikimit së bashku me distinktivin e policisë së Serbisë, kartelën e sindikatës së policisë serbe, letërnjoftimi i Serbisë dhe Kosovës, pasaporta e Serbisë, një palë spaleta të uniformës, një palë dorëza dhe një USB. Me vendim të prokurorit i dyshuari është dërguar në mbajtje. Rasti është duke u hetuar”, thuhet në raportin policor.