Avokati Veton Rrecaj, i cili mbron të arrestuarin Adhurim Konjufca, ka deklaruar se klienti i tij ka mohuar kategorikisht çfarëdo lidhjeje apo përfshirjeje me të shtënat me armë zjarri ndaj autosallonit në Veternik.
I kontaktuar nga Gazeta Insajderi, avokati Rrecaj tha se Konjufca ka dhënë deklaratën e tij para organit të ndjekjes, duke hedhur poshtë dyshimet e ngritura ndaj tij.
“Deklaroj se klienti im ka mohuar të jetë përfshirë në çfarëdo mënyre në lidhje me atë sulm,” ka thënë avokati Veton Rrecaj për Insajderin.
Adhurim Konjufca është arrestuar nga Policia e Kosovës në orët e vona të mbrëmjes së mbrëmshme, si i dyshuar për përfshirje në incidentin e ndodhur në mesnatën e 24/25 prillit 2026, ku drejt hapësirave të një autosalloni u shti me armë zjarri duke shkaktuar dëme materiale në disa automjete.
Ndaj të dyshuarit pritet që prokurori i rastit brenda afateve ligjore të parashtrojë kërkesë në Gjykatën Kompetente për caktimin e masës së sigurisë.