Sot është mbajtur procesi i intervistimit për kandidatët për kryeprokuror të shtetit.
Lidhur me këtë ka reaguar AVONET, anëtarë të së cilës ishin edhe monitorues të procesit.
Sipas kësaj organizate, procesi u vlerësua lart, veçanërisht për transparencën gjatë zhvillimit të tij dhe zbatimin e standardeve të barabarta për të gjithë kandidatët.
Reagimi i plotë:
Sot u mbajt procesi i intervistimit të kandidatëve për pozitën e Kryeprokurorit të Shtetit.
AVONET vlerëson lart transparencën e këtij procesi dhe konsideron se Këshilli Prokurorial i Kosovës ka krijuar praktika të mira në organizimin dhe zhvillimin e procedurave të përzgjedhjes për pozitat më të larta në sistemin prokurorial.
Po ashtu, vlerësojmë faktin se Këshilli Prokurorial i Kosovës u ka mundësuar organizatave të shoqërisë civile, mediave dhe përfaqësuesve ndërkombëtarë të jenë të pranishëm dhe të monitorojnë nga afër këtë proces me rëndësi të veçantë për sistemin e drejtësisë.
Gjatë intervistimit u aplikuan standarde të barabarta për të gjithë kandidatët, si në formulimin e pyetjeve ashtu edhe në kohën e ndarë për përgjigje. Kjo dëshmon për përkushtimin e Panelit Vlerësues për të garantuar paanshmëri, trajtim të barabartë dhe integritet gjatë gjithë procesit të vlerësimit.
AVONET konsideron se praktika të tilla rrisin besimin e publikut në institucionet e drejtësisë, forcojnë llogaridhënien institucionale dhe kontribuojnë në ndërtimin e një procesi transparent, të besueshëm dhe të bazuar në meritë.