Avokati Ardian Bajraktari ka thënë se njëri nga prokurorët e Dhomave të Specializuara, i cili më parë ka shërbyer si gardian, ngjall dyshime për mungesë transparence nga Gjykata Speciale në Hagë.
Në një intervistë për Ekonomia Online, Bajraktari theksoi se mungesa e transparencës në emërimin e këtij prokurori është shqetësuese dhe bie ndesh me kërkesat ligjore për pavarësi dhe paanshmëri.
“Prej elementeve që kanë karakterizuar në vazhdimësi procesin e Dhomave të Specializuara ka qenë mungesa e transparencës dhe në këtë drejtim vlerësoj që Zyra e Prokurorit të Specializuar ka qenë e detyruar të jetë më transparente në raport me procedurën e emërimit të personit në fjalë. Për të ushtruar një funksion të tillë, natyrisht duhet të ketë diplomë përkatëse, pastaj edhe përvojën e nevojshme, të cilën nuk e dimë nëse personi në fjalë e plotëson”, deklaroi Bajraktari për EO.
Sipas tij, kontakti i mëparshëm i këtij prokurori me të akuzuarit mund të ndikojë në kredibilitetin e procesit dhe në ushtrimin objektiv të detyrës.
“Për më tepër, referuar dispozitave të Ligjit për Dhomat e Specializuara, saktësisht nenit 36, në rastin e fillimit apo parafillimit të punës, gjyqtarët dhe prokurorët detyrohen të nënshkruajnë një deklaratë solemne, përmes së cilës zotohen se punën e tyre do ta kryejnë me përkushtim, objektivitet dhe paanshmëri”, theksoi ai për EO.
Avokati shtoi se kjo situatë krijon dyshime të theksuara për paanshmëri dhe cenon besimin në drejtësinë e gjykimit të ish-krerëve të UÇK-së në Hagë.
“Në bindjen time, sa i përket personit në fjalë, lehtësisht mund të kontestohet fakti se i njëjti ka qenë në kontakt të vazhdueshëm me persona që aktualisht po përballen me një proces të padrejtë. Emërimi i tij në këtë pozitë është një proces që ngre dyshime të theksuara për kredibilitetin dhe mundësinë që ai të ushtrojë funksionin e tij në mënyrë të pavarur dhe të paanshme”, shtoi avokati.
