Deputetja e LDK-së, Hykmete Bajrami, i është përgjigjur deputetit të Vetëvendosjes, Hekuran Murati, i cili shpërndau një pjesë të aktgjykimit të Gjykatës Kushtetuese ku thotë që se “në konstituimin e Kuvendit, të gjithë deputetët duhet të jenë të pranishëm dhe të votojnë si të dëshirojnë, në mënyrë të hapur ose të fshehtë, të votojnë “për”, “kundër” ose të abstenojnë”.
Bajrami tha se Muratit i duhet ende kohë për të kuptuar “bazat e ligjshmërisë dhe kushtetutshmërisë”, ndërsa bashkëngjiti një nen të Kushtetutës që thotë se “deputeti nuk i nënshtrohet asnjë mandati detyrues kur voton apo jo”.
“Deputetit Murati, që sot flet për përgjegjësi kushtetuese, i duhet ende kohë për të kuptuar bazat e ligjshmërisë dhe kushtetutshmërisë që rregullojnë punën e Kuvendit. Deputeti Murati, që shkel Kushtetutën duke mbajtur post ministri, në kundërshtim me parimin e ndarjes së pushteteve, neni 72 i Kushtetutës së Republikës së Kosovës👇, duhet ta dijë se deputeti nuk i nënshtrohet asnjë mandati detyrues kur voton apo jo. Kështu e thotë Kushtetuta, neni 70, pika 1”.
Bajrami tha se po reagon për sqarim për qytetarët sepse tha se e konsideron “fyerje” të debatojë me “ata që e kanë shkelur “Kushtetutën me numra dyshifrorë”.
“Këtë reagim e bëj për qytetarët e Republikës sepse është fyerje e inteligjencës e humbje kohe të diskutosh e debatosh për kushtetutshmëri me ata që kanë shkelur Kushtetutën me numra dyshifrorë, me ata që janë duke shkelur Kushtetutën teksa flasin e shkruajnë statusa duke mbajtur pozita ekzekutive e legjislative në të njëjtën kohë, me ata që shkelin Kushtetutën duke ua mohuar të drejtat mbi 90 mijë shërbyesve civilë”, shkroi në fb, Bajrami.