Kryetari i Komunës së Suharekës, Bali Muharremaj, ka folur rreth qasjes se tij të hapur dhe angazhimin për të qenë gjithmonë pranë qytetarëve.
Muharremaj theksoi se nuk ka një orar të caktuar për të qenë në shërbim të qytetarëve. “Për mua, orari nuk përfundon në orën 16:00, unë jam gjithmonë i gatshëm të jem pranë qytetarëve. Ndonjëherë mund të dal nga shtëpia që në orën 7:30 të mëngjesit, shkoj në terren, vizitoj kompani që janë në proces pune, fshatra dhe shkolla, dhe pastaj shkoj në komunë,” shpjegoi ai.
Sipas tij, është më e rëndësishme të jesh afër qytetarëve dhe të dëgjosh shqetësimet e tyre për të marrë vendime të informuara. “Më mirë është të shkoj unë tek ata, se sa ata të vijnë në zyrë”.
Përveç kësaj, Muharremaj theksoi se çdo të enjte i kushton kohë të veçantë qytetarëve. “Çdo të enjte jam në dispozicion të qytetarëve, pa dallim, dhe nuk ka telefonata ose orare fikse. Prej te parit e deri te i fundit, nuk kam lënë kurrë asnjë qytetar të presë pa biseduar me të. Çdo herë që shoh dikë që ka ardhur në zyrë, e marr dhe bisedoj me të për t’u siguruar që mund të ndihmoj,” përfundoi ai.