Kryetari i Kuvendit të Kosovës, Dimal Bashka, ka shprehur keqardhje për mungesën e pjesëmarrjes së deputetëve në seancën e parë të jashtëzakonshme të zhvilluar paraditen e sotme.
Seanca kishte për rend dite çështje me rëndësi të madhe për aspektin financiar të vendit dhe mirëqenien e qytetarëve.
Mes tyre ishin themelimi i komisioneve parlamentare, ratifikimi i pesë marrëveshjeve ndërkombëtare të sponsorizuara nga Presidentja Vjosa Osmani Sadriu, të cilat parashikojnë investime dhe grante prej rreth 1 miliard eurosh, si dhe miratimi i Buxhetit të vitit 2026, në vlerë prej afro 4 miliardë eurosh.
Në fokus ishte gjithashtu situata buxhetore e komunave Prishtinë, Gjilan dhe Zubin Potok, si dhe çështjet financiare të RTK-së dhe pagat e punëtorëve të saj.
Bashka theksoi gatishmërinë e tij për të bashkëpunuar me Kryesinë e Kuvendit në themelimin e komisioneve të përhershme dhe krijimin e kushteve institucionale për miratimin e këtyre çështjeve.
Megjithatë, përveç Grupit Parlamentar të Lëvizjes VETËVENDOSJE, grupit Multietnik dhe nënkryetarit Rashiq, pjesëmarrja e deputetëve nga grupet e tjera ishte e pamjaftueshme, duke bërë që Kuvendi të mos arrijë kuorumin për vendimmarrje.
Bashka shprehu keqardhje për këtë mungesë, duke theksuar rëndësinë e pjesëmarrjes së gjerë për procesin dhe përgjegjësinë institucionale.