Anëtari i Presidencës së Bosnjë-Hercegovinës, Denis Beqiroviq, ka paralajmëruar nga Asambleja e Përgjithshme e Organizatës së Kombeve të Bashkuara se udhëheqësia aktuale e Republikës Srpska përbën kërcënim për paqen dhe sigurinë e Bosnjë-Hercegovinës dhe të rajonit.
Në fjalimin e tij në 81-vjetorin e Asamblesë së Përgjithshme të OKB-së, Beqiroviq ka folur për situatën në Bosnjë-Hercegovinë, duke kritikuar gjithashtu Serbinë për glorifikimin e kriminelit të luftës, Ratko Mlladiq.
Beqiroviq ka thënë se është veçanërisht e rrezikshme që udhëheqësia e Serbisë e glorifikon Mlladiqin, i cili është dënuar përfundimisht nga gjykatat ndërkombëtare.
“Është veçanërisht e rrezikshme që udhëheqësia e Republikës së Serbisë e glorifikon kriminelin e dënuar të luftës Ratko Mladiq. Përbindëshi Ratko Mladiq nuk është hero, por një kriminel lufte i dënuar. Glorifikimi institucional i këtij krimineli lufte është një akt kundër-civilizues dhe i papranueshëm. Kjo nënkupton që lidershipi shtetëror i Serbisë identifikohet me njërin nga kasapët më të mëdhenj në historinë evropiane. Është një tregues se Serbia nuk e ka braktisur ideologjinë dhe politikat që çojnë në agresion dhe gjenocid. Është një sulm i drejtpërdrejtë ndaj vlerave të OKB-së, gjykata e së cilës dha një vendim përfundimtar kundër këtij krimineli lufte. Më lejoni t’ju kujtoj se Serbia është i vetmi shtet në botë që është gjetur nga një gjykatë e OKB-së se ka shkelur Konventën e OKB-së për Parandalimin dhe Dënimin e Krimit të Gjenocidit”, ka thënë Beqiroviq gjatë fjalimit.
Ai ka kërkuar nga bashkësia ndërkombëtare që ta dënojë sjelljen e Serbisë dhe të ndërmarrë masa ndaj atyre që glorifikojnë kriminelët e dënuar të luftës.
“Fatkeqësisht, ideologjia dhe politikat që çuan në gjenocidin kundër boshnjakëve vazhdojnë të kërcënojnë Bosnjën dhe Hercegovinën. Nga podiumi i Asamblesë së Përgjithshme të OKB-së, dëshiroj të paralajmëroj publikisht publikun ndërkombëtar se lidershipi aktual i entitetit boshnjak Republika Srpska vazhdon të kërcënojë paqen dhe sigurinë e Bosnjës dhe Hercegovinës dhe të rajonit”, ka thënë ai.
Beqiroviq ka theksuar gjithashtu se Bosnja dhe Hercegovina synon anëtarësimin në Bashkimin Evropian dhe NATO, ndërsa ka thënë se presionet politike dhe përpjekjet për ta penguar funksionimin e shtetit vazhdojnë.
Në të njëjtën Asamble të Përgjithshme të OKB-së, Serbinë e ka kritikuar edhe kryeministri kroat, Andrej Plenkoviq.
Plenkoviq ka deklaruar se nderimet ushtarake dhe zyrtare që iu dhanë Mlladiqit në Serbi përbëjnë fyerje për viktimat dhe për vendimet e gjykatave ndërkombëtare.
“nderimet ushtarake dhe zyrtare që iu dhanë Mlladiqit në Serbi ishin fyerje për viktimat e tij dhe për vendimet e gjykatave ndërkombëtare, pjesëmarrja e përfaqësuesve shtetërorë dhe duartrokitjet publike që shoqëruan ceremoninë janë krejtësisht të papajtueshme me vlerat e një Unioni që Serbia kërkon t’i bashkohet”, ka thënë Plenkoviq.