Analisti Besnik Shabiu ka folur për ligjin e miratuar në Kuvendin e Kosovës lidhur me Gjykatën Speciale, duke theksuar se për të ndihmuar krerët e UÇK-së që po gjykohen në Hagë, nevojitet edhe mbështetja e ndërkombëtarëve.
Në emisionin “Forum” në DTV Media, gjatë debatit me analistin Visar Ymeri, Shabiu deklaroi se, po të varej vetëm nga dëshira e tij, do t’i kthente menjëherë krerët e UÇK-së nga Haga, por sipas tij, Kosova nuk mund ta bëjë këtë pa ndihmë dhe përkrahje ndërkombëtare.
“Me qejfin tem, unë sot i kthej ata prej Hagës, po pa ndërkombëtarët nuk është që mujna me ba najsen. Na duhet shumë ndihmë”, u shpreh Shabiu.
Duke komentuar votimin e ligjit për Gjykatën Speciale në Kuvend, analisti foli edhe për presionin qytetar që u shfaq përmes protestave kundër trajtimit të krerëve të UÇK-së në Hagë. Sipas tij, reagimi i qytetarëve ka qenë pjesë e debatit politik rreth këtij ligji dhe qëndrimit të institucioneve.
Shabiu përmendi gjithashtu qëndrimin e kryeministrit Albin Kurti, i cili, sipas tij, nuk është pajtuar me ligjin e miratuar në Kuvend. Ai tha se Kurti ka theksuar se ligji nuk është çështje urgjente, ndonëse votimi dhe protestat kanë nxitur debat të madh politik e publik.