Bashkësia Islame e Kosovës (BIK) ka njoftuar se sot, në të gjitha xhamitë anekënd vendit, me rekomandim të Myftiut të Kosovës, Naim Tërnava, u mbajt një hytbe e përbashkët kushtuar festës së 28 Nëntorit.
Në këtë hytbe u theksua se 28 Nëntori nuk është më vetëm një datë e rëndësishme në kalendarin tonë, por është shndërruar në një simbol të bashkimit rreth interesit kombëtar.
“Duke e cilësuar përkushtimin për atdheun si një detyrë fisnike të çdo qytetari, u përmend se dashuria për atdheun të afron më tepër te Zoti dhe se sakrifica për të është një vepër që të ngre në radhët e dëshmorëve.”
Një nga pikat e rëndësishme të hytbes ishte edhe theksimi i kontributit themeltar të parisë myslimane për kombin dhe arsimin, duke ngritur zërin kundër keqdashësve që, siç u tha, sot po synojnë ta shndërrojnë çështjen kombëtare në burim përçarjeje.