Avokati i ish-kryeparlamentarit Jakup Krasniqi, Mentor Beqiri, ka thënë se procesi i gjykimit ndaj klientit të tij, por edhe ndaj Hashim Thaçit, Kadri Veselit e Rexhep Selimit, ka qenë i gjatë dhe i ndërlikuar.
Megjithatë, ai tha se gjatë dosjes së Prokurorisë, janë vërtetuar qartësisht qëndrimet e Mbrojtjes, të dhëna gjatë fjalës hyrëse në prill 2023.
“Ka qenë një proces i gjatë dhe i ndërlikuar, i cili ka kërkuar durim, përkushtim dhe përballje me situata të shumta. Ky rast dhe ky gjykim tregojnë se drejtësia nuk është thjesht një fjalë, por një përpjekje e vazhdueshme për të zbardhur të vërtetën. Të vërtetën e lavdishme të Ushtrisë Çlirimtare të Kosovës. Të vërtetën e lavdishme të Jakup Krasniqit, Hashim Thaçit, Kadri Veselit e Rexhep Selimit. Gjatë dosjes së Prokurorisë, qartësisht u vërtetuan qëndrimet e Mbrojtjes, të dhëna gjatë fjalës hyrëse në Prill 2023”, deklaroi Beqiri, raporton klankosova.
Ai tha se “mbyllja e dosjes nga Prokuroria nuk është epilog, por një hap i rëndësishëm në rrugën drejt përfundimit të këtij procesi”.
“Drejtësia kërkon kohë, por mbi të gjitha kërkon vendosmëri. Sot është një ditë për të reflektuar mbi këtë rrugëtim dhe për të punuar me vëmendje në hapat e mëtejshëm”, u shpreh avokati i Krasniqit.
Beqiri tha se pas fazës së gjykimit, e cila ka zgjatur për dy vite të plota dhe një procedure paraprake që e ka çuar kohëzgjatjen totale në katër vite e gjysmë deri tani, Prokuroria është afër mbylljes së dosjes së saj, në rastin Prokurori v Thaçi, Veseli, Selimi dhe Krasniqi.