I dënuari, 34 vjeçari Huseyin Akkurt (majtas) pranë avokatit të tij mbrojtës, Tobias Diedrich. Foto: DPA
34 vjeçari Huseyin Akkurt, është dënuar me burgim të përjetshëm për vrasjen e boksierit shqiptar, Besar Nimanit.
Vendimi u mor sot nga Gjykata e Bielefeldit, transmeton Klankosova.tv.
Ngjarja tragjike kishte ndodhur më 9 mars të vitit të kaluar (2024), në këtë qytet.
Boksieri nga Kosova, Besar Nimani, u vra me 16 plumba.
Vrasja u konstatua se ishte kryer nga Akkurt bashkë edhe me një person tjetër i cili gjendet ende në arrati, raportojnë mediat gjermane.
Trupi gjykues gjatë shpalljes së vendimit deklaroi se vrasja ishte planifikuar mirë.
I pandehuri nuk u deklarua gjatë këtij procesi për t’i shpjeguar motivet e kësaj vrasje.
Por, gjykata ka gjetur mjaft prova për ta dënuar kurdin me burgim të përjetshëm.
Edhe Prokuroria dhe avokatët e familjes Nimani, kërkuan dënimin maksimal.
Në fund të shkurtit para gjykatës në Bielefeld ka pasur edhe të shtëna me armë zjarri, ku janë plagosur katër persona, ndër ta edhe babai i të dënuarit.
Për këtë vepër janë arrestuar vëllai dhe motra e Besar Nimanit, të cilët dyshohet se kanë shtënë në shenjë hakmarrjeje.
Ata janë nën masa arresti, por akoma nuk ka ndonjë aktuakuzë, shkruan Frankfurter Allgemeine Zeitung, transmeton Klankosova.tv.