Dalin pamjet e rrahjes së biznesmenit të ndërtimit në Istog [VIDEO]

Biznesmeni Ylber Blakaj është sulmuar me kondak të armës, grushte e shqelma, tregojnë pamjet nga kamerat e sigurisë.

Blakaj, drejtues i disa bizneseve në fushën e ndërtimit, është sulmuar nga dy persona të mërkurën e javës së kaluar në një lokal në Istog.

Pamjet e publikuara sot tregojnë sesi dy të dyshuarit, të arrestuar të hënën, i afrohen Blakajt te tavolina ku po qëndronte i vetëm dhe nisin sulmin ndaj tij pasi ngritet në këmbë dhe përpiqet të largohet nga lokali.

Prokuroria Themelore në Pejë tha të martën se dy të dyshuarit janë arrestuar dhe se do të ndiqen penalisht për tri vepra penale, përfshirë shkaktimin e rrezikut të përgjithshëm.

Sipas Prokurorisë, dy të dyshuarit dyshohet se kanë shtënë me armë zjarri brenda lokalit duke e thyer një xham.

Ylber Blakaj është një sipërmarrës i njohur në qytetin e Istogut. Ai është pronar i dy bizneseve të cilat merren me ndërtim dhe prodhim të energjisë elektrike, bazuar në të dhënat publike në Agjencinë për Regjistrimin e Bizneseve (ARBK).