Daut Haradinaj, ka reaguar pas aktgjykimit të Dhomave të Specializuara në Hagë ndaj ish-krerëve të UÇK-së, të cilët u dënuan me gjithsej 81 vjet burgim.
Haradinaj, përmes një postimi në Facebook, ka bërë thirrje që institucionet e Kosovës të ndërmarrin, siç ka thënë ai, masa të menjëhershme lidhur me mënyrën se si është trajtuar rasti në Gjykatën Speciale.
“Beteja për drejtësinë do të vazhdojë deri në drejtësinë e plotë, deri në lirimin e tyre nga secila akuzë”, ka shkruar Haradinaj.
Ai ka deklaruar se UÇK-ja ishte ushtri çlirimtare dhe se, sipas tij, asnjë gjykatë nuk mund ta dënojë atë që e cilësoi si “shpirtin çlirimtar”.
Haradinaj ka kërkuar nga institucionet e Kosovës që të reagojnë dhe të ndërmarrin veprimet që i konsiderojnë të nevojshme në mbrojtje të luftëtarëve të UÇK-së.
“Kosova dhe institucionet e saj duhet të marrin masa të menjëhershme për mënyrën se si është sjellë kjo gjykatë politike ndaj atyre që luftuan për lirinë e Kosovës. Heshtja nuk është më e pranueshme”, ka shkruar ai.
Ai ka thënë se do të vazhdojë të qëndrojë në mbështetje të katër ish-krerëve të UÇK-së dhe të ushtarëve të saj.
“Deri në fund. Deri në drejtësi. Jemi bashkë me ata katër burra atje, me secilin ushtar të UÇK-së”, ka shkruar Haradinaj.