Analisti politik Dugagjin Gorani, në emisionin “FORUM” në DTV Media, ka folur për situatën politike dhe raportet mes partive në Kosovë.
Gorani ka vlerësuar se PDK-ja ka mbetur pa kamp në situatën aktuale politike, ndërsa sipas tij janë krijuar dy kampe që po synojnë zgjedhje të reja.
Megjithatë, ai ka thënë se këto subjekte nuk po i kërkojnë zgjedhjet domosdoshmërisht sepse presin përfitim prej tyre, por sepse nuk kanë formulë, ilaç apo kapacitet për ta zgjidhur situatën aktuale politike, e cila, sipas tij, kërkon kompromis.
Sipas Goranit, LVV-ja nuk tregon gatishmëri për kompromis, ndërsa partitë opozitare që synojnë marrjen e pushtetit përmes një marrëveshjeje janë numerikisht të dobëta përballë ambicieve që kanë.
Ai ka theksuar se opozita nuk e ka fuqinë numerike për ta arsyetuar kërkesën për një ndarje të pushtetit me LVV-në në rast të një koalicioni apo kompromisi politik.
“Numerikisht fuqi nuk kanë, por ambicie kanë”, ka thënë Gorani, duke shtuar se kërkesa e partive opozitare për të pasur pjesë në pushtet është legjitime nga këndvështrimi i tyre, por sfida kryesore mbetet mungesa e fuqisë numerike për ta realizuar atë.