Analisti politik Dukagjin Gorani ka shprehur shqetësimin e tij për gjendjen e përgjithshme të shoqërisë në Kosovë, duke theksuar një degradim në disa dimensione kyçe.
Në një deklaratë për DTV Media, Gorani tha se nuk e kishte imagjinuar as para 10, 20 apo 30 vitesh që shoqëria do të humbte rrugën në aspektin politik, ekonomik dhe kulturor.
Sipas tij, më shqetësuese është humbja e orientimit moral, duke shtuar se shoqëria po shndërrohet në një komunitet me standarde më të ulëta etike.
“Jemi duke u bërë njerëz më të këqij dhe po krijojmë një zakon që, për shkak të mosdijes sonë, gjithmonë të fajësojmë dikë tjetër,” theksoi ai.
Gorani kritikoi ashpër edhe kulturën e fajësimit, duke thënë se mungon përgjegjësia individuale dhe kolektive, pasi askush nuk pranon fajin e vet. Sipas tij, kjo qasje është shndërruar në një mjet të zakonshëm politik, duke e quajtur atë “valutë politike” që përdoret për të shmangur përgjegjësinë dhe për të manipuluar opinionin publik.