Prokuroria e Tiranës ka nisur hetimet për plagosjen e 28-vjeçarit Erion Vishkulli gjatë protestës së 24 tetorit në kryeqytetin shqiptar. I riu dyshohet se u godit me plumb gome në sy dhe është dërguar në Itali për trajtim të specializuar.
Sipas njoftimit zyrtar, është regjistruar kryesisht procedimi penal nr.7806 për vitin 2026, për veprat penale “Shpërdorimi i detyrës” dhe “Kryerja e veprimeve arbitrare”.
Në kuadër të hetimeve janë administruar pamjet filmike të vëna në dispozicion nga Banka e Shqipërisë dhe kartela mjekësore e të riut nga Spitali Universitar i Traumës. Veprimet hetimore po zhvillohen në bashkëpunim me Agjencinë e Mbikëqyrjes Policore (AMP).
Prokuroria po punon edhe për komunikimin me autoritetet italiane, me qëllim dërgimin e një letërporosie në kuadër të hetimit.
Po hetohen edhe lëndimet e protestuesve të tjerë
Në të njëjtin procedim po hetohen edhe raste të tjera të dëmtimit të qytetarëve, pas dyshimeve për përdorim joproporcional të forcës nga disa punonjës të Policisë së Shtetit gjatë protestave.
Deri tani janë administruar rreth 20 kartela mjekësore të personave të dëmtuar, ndërsa verifikimet po kryhen në bashkëpunim me AMP-në.
Hetimet vijojnë për sqarimin e rrethanave të ngjarjes dhe dokumentimin e përgjegjësive të mundshme.