Një ngjarje e rëndë ka tronditur fshatin Llukar të Prishtinës, ku një 29-vjeçar ka humbur jetën tragjikisht si pasojë e një aksidenti në komunikacion.
Viktima është Laurent Krasniqi, TikToker i njohur dhe ish-banor i “Big Brother VIP Kosova”, i cili dyshohet se pësoi vetëaksident, duke u rrëzuar nga motori gjatë lëvizjes.
Laurenti u dërgua me urgjencë në Qendrën Emergjente të QKUK-së, ku ekipet mjekësore ndërmorën të gjitha masat e nevojshme për t’ia shpëtuar jetën. Megjithatë, për shkak të lëndimeve të rënda, ai nuk arriti t’u mbijetojë plagëve.
Krasniqi ishte i angazhuar edhe në fushën e medias. Para disa vitesh, Laurenti ishte pjesë e DTV MEDIA, ku kishte punuar si kameraman. Ai do të kujtohet nga kolegët për përkushtimin, energjinë dhe kohën që kaloi si pjesë e stafit tonë.
DTV MEDIA shpreh pikëllimin e thellë për ndarjen e parakohshme nga jeta të ish-kolegut dhe bashkëpunëtorit tonë, Laurent Krasniqi.
Lajmi për humbjen e tij të parakohshme ka prekur thellë të gjithë ata që e njohën dhe punuan me të.
Laurenti ishte pjesë e familjes së DTV MEDIA-s dhe kujtimi për të do të mbetet gjithmonë i veçantë për kolegët e tij.
Në këto momente të rënda, DTV MEDIA u shpreh ngushëllimet më të sinqerta familjes Krasniqi, miqve, të afërmve dhe të gjithë atyre që e njohën Laurentit.
U prehtë në paqe!
Me dhimbje,
DTV MEDIA