E mërkura e 2 shtatorit ishte një nga ditët më të rënda në Kosovë sa i përket aksidenteve me fatalitet, pasi tre persona humbën jetën në tri raste tragjike.
Dy nga aksidentet me fatalitet ndodhën të mërkurën në rajonin e Prishtinës.
Në rrugën Ferizaj–Prishtinë, në Çagllavicë, rreth orës 15:35, një këmbësor u godit nga një veturë. I lënduari u dërgua për trajtim në Qendrën Klinike Universitare të Kosovës (QKUK), ku mjekët konstatuan vdekjen e tij.
Me vendim të prokurorit, trupi i pajetë u dërgua në Institutin e Mjekësisë Ligjore (IML) për obduksion, ndërsa vozitësi i dyshuar u arrestua dhe u dërgua në mbajtje.
Një tjetër aksident me fatalitet ndodhi në fshatin Llukar të Prishtinës, pak pas orës 20:00.
Sipas Policisë, në aksident u përfshinë një veturë dhe një motoçikletë. Drejtuesi i motoçikletës pësoi lëndime të rënda dhe u dërgua në Emergjencën e QKUK-së, ku më pas u konstatua vdekja e tij.
Edhe në këtë rast, me urdhër të prokurorit, trupi i pajetë u dërgua në IML për obduksion, ndërsa i dyshuari u arrestua dhe u dërgua në mbajtje.
Ndërkohë, më 2 shtator ka vdekur edhe një person i cili ishte duke u trajtuar në Spitalin e Vushtrrisë, pas një aksidenti të ndodhur më 5 gusht.
Viktima ishte goditur nga një veturë dhe që nga dita e aksidentit po trajtohej në repartin intensiv. Me urdhër të prokurorit, trupi i pajetë u dërgua në IML për obduksion.
Një tjetër rast, i rrallë për nga mënyra se si ndodhi, por që përfundoi vetëm me lëndime, u shënua në Mitrovicë, ku viktimë ishte një zyrtar policor.
Polici pësoi vetëm lëndime të lehta pasi u godit nga një automjet në lëvizje, derisa po rregullonte trafikun në rrugën “Shemsi Ahmeti”.
Sipas Policisë, vozitësi u largua nga vendi i ngjarjes me veturë dhe ende nuk është identifikuar.
Zyrtari policor, pas trajtimit mjekësor, është liruar.