Në Gjykatën e Apelit është mbajtur sot seanca ndaj Kosovar Elshanit, i dënuar nga gjykata e shkallës së parë me 10 vjet e 5 muaj burgim për tentimvrasjen e ish-bashkëshortes së tij.
Rasti kishte ndodhur më 24 nëntor 2025 në Gadime të Epërme të Lipjanit. Elshani ishte akuzuar se e kishte sulmuar ish-bashkëshorten me sëpatë, duke i shkaktuar lëndime për të cilat ajo ishte dërguar për trajtim në Qendrën Klinike Universitare të Kosovës.
Pas sulmit, Elshani ishte larguar nga vendi i ngjarjes, ndërsa Policia kishte nisur kërkimin e tij. Ai ishte arrestuar më vonë në Prizren. Në atë kohë, Policia kishte njoftuar se rasti po hetohej si “vrasje në tentativë”, ndërsa gjendja e së dëmtuarës ishte raportuar stabile.
Pas zhvillimit të procesit gjyqësor, Gjykata Themelore e kishte shpallur fajtor Elshanin dhe e kishte dënuar me 10 vjet e 5 muaj burgim.
Ndaj këtij aktgjykimi është paraqitur ankesë, ndërsa vendimin e shkallës së parë e ka kundërshtuar edhe familja e së dëmtuarës.
Gjatë seancës së sotme, kolegji i Apelit ka shqyrtuar pretendimet e palëve lidhur me aktgjykimin dhe lartësinë e dënimit të shqiptuar ndaj Elshanit.
Pas shqyrtimit të ankesave, Gjykata e Apelit mund ta vërtetojë ose ta ndryshojë aktgjykimin, apo ta anulojë atë dhe çështjen ta kthejë në rigjykim.
Vendimi ndaj Kosovar Elshanit nuk është i formës së prerë deri në përfundimin e procedurës në shkallën e dytë.