Ish-diplomatja kritikon mungesën e veprimit të OKB-së dhe vlerëson rolin vendimtar të SHBA-së në ndaljen e luftës në Kosovë.
Ish-diplomatja kosovare, Edita Tahiri, ka deklaruar se rendi botëror aktual duhet ndryshuar, duke kritikuar ashpër rolin e Kombeve të Bashkuara për mungesë veprimi në situata krizash ndërkombëtare.
Në një reagim të publikuar së fundmi, Tahiri ka krahasuar qëndrimin e Sekretarit të Përgjithshëm të OKB-së, António Guterres, lidhur me zhvillimet në Iran, me situatën gjatë luftës në Kosovë. Ajo theksoi se pa ndërhyrjen e Shteteve të Bashkuara, lufta në Kosovë nuk do të ndalej, pavarësisht tri rezolutave të miratuara nga Këshilli i Sigurimit i OKB-së.
“Derisa Trump po bëhet gati të ndërhyjë në Iran për të parandaluar vrasjen e protestuesve që kërkojnë demokraci, Guterres shprehet i tronditur vetëm me fjalë, jo me veprime. Sikur të mos ishte ndërhyrja amerikane për ndaljen e luftës në Kosovë, sa për OKB-në, lufta nuk do të ndalej,” ka deklaruar Tahiri.
Ajo shtoi se ky është një nga arsyet kryesore pse duhet të ndryshohet rendi botëror, duke nënvizuar se organizatat ndërkombëtare duhet të kenë mekanizma më efektivë për të vepruar në mbrojtje të jetës dhe demokracisë.
Deklarata e saj vjen në kohën e tensioneve të shtuara ndërkombëtare dhe debatit mbi rolin e institucioneve globale në parandalimin e konflikteve dhe shkeljeve të të drejtave të njeriut.