Deputeti i LDK-së, Arben Gashi, ka thënë që bllokimi institucional është plan i Lëvizjes Vetëvendosje, raporton Ekonomia Online.
Ai ka thënë çështjet politike duhet të zgjidhen përmes kompromisit politik, sepse rregullimi i tepërt çon në bllokim institucional.
“Kanë qenë pikërisht deputetët e Vetëvendosjes që kanë insistuar që udhëzimet të kenë fuqi detyruese, dhe tani po e përdorin këtë instrument kundër interesave të Kosovës, instrument që nuk është dashur të ekzistojë në këtë formë. Rregullimi i tepërt është problem. Koncepti im ka qenë që nuk duhet të rregullohen çështje që janë në thelb politike. Çështjet politike duhet të zgjidhen përmes kompromisit politik, sepse rregullimi i tepërt çon në bllokim institucional. Dhe tani jemi në një bllokim institucional, si rezultat i veprimeve të paarsyeshme dhe si rezultat i Lëvizjes Vetëvendosje për të bllokuar Kuvendin.Pra, shihet qartë se ekziston një plan për të bllokuar institucionet në Kosovë. Cili është përfitimi i saj, nuk e di”, tha ai.
