Ambasada e Gjermanisë në Kosovë ka shprehur mbështetje të plotë për qëndrimin e Bashkimit Evropian lidhur me ndryshimet e propozuara në Ligjin për Dhomat e Specializuara të Kosovës, të njohura si Gjykata Speciale.
Përmes një reagimi të shkurtër, Ambasada gjermane ka bërë të ditur se pajtohet plotësisht me deklaratën e publikuar më herët nga Zyra e BE-së në Kosovë.
“Ne pajtohemi plotësisht me këtë deklaratë të BE-së”, thuhet në reagimin e Ambasadës së Gjermanisë.
Ndërkaq, Bashkimi Evropian kishte shprehur shqetësim lidhur me mundësinë që Kuvendi i Kosovës të votojë ndryshimet në këtë ligj, duke vlerësuar se propozimet ngrenë shqetësime serioze për përmbushjen e obligimeve ndërkombëtare të Kosovës.
BE-ja kishte veçuar në mënyrë të posaçme çështjet që lidhen me pavarësinë e gjyqësorit, mbrojtjen e viktimave dhe dëshmitarëve, si dhe kushtetutshmërinë e ndryshimeve të propozuara.
Po ashtu, Bashkimi Evropian kishte ritheksuar nevojën për konsultime paraprake me autoritetet përkatëse para miratimit të çfarëdo ndryshimi në Ligjin për Dhomat e Specializuara.