Christopher Hill, i dërguar i SHBA-së për Kosovën gjatë kohës së luftës, u kthye të flasë për takimet e tij me Hashim Thaçin, duke iu përgjigjur pyetjeve të Prokurorisë në Gjykatën Speciale në Hagë.
Diplomati amerikan tha se nuk ka dijeni nëse Thaçi në vitin 1997 kishte sjellë armë në Kosovë.
Ai tha se luftimet minonin procesin e paqes që po e zhvillonin atë kohë me Ibrahim Rugovën.
Lidhur me Rambujenë, ai foli për tre fraksione të ndryshme në delegacionin kosovar.
“Ne jemi takuar me tre fraksione të ndryshme në Rambuje: me LDK-në, me UÇK-në dhe me të ashtuquajturit intelektualë të pavarur”, tha ai.
SHBA-ja, siç tha Hill, ishte e interesuar që të tri fraksionet t’i mbështesnin propozimet që hedheshin në tavolinë nga Washingtoni.
“Unë nuk isha i interesuar të mbështesja një grupim”, tha ai.
Për procesin e paqes në Rambuje, Hill tha se ishin në kontakt edhe me autoritetet shqiptare. “E dinim që Shqipëria e mbështeste procesin e Rambujesë”.