Nuk jam kompetent të bëj historinë e marrëdhënieve shqiptare-jugosllave mbas vitit 1945, sepse ato kanë evoluar në vite sipas konjukturave gjeopolitike, por për periudhën mbas vitit 1979 e deri më 1991 mund të them me përgjegjësi se konkluzionet e këtij shkrimi të z. Dashnor Kaloçi janë të pavërteta dhe antihistorike.
Po rreshtoj për lexuesin disa fakte të thjeshta, si bashkëkohës e specialist për atë periudhë.
Në vitin 1979, në aparatin e KQ të PPSH u krijua një sektor politik që trajtonte dhe orientonte të gjitha institucionet e shtetit shqiptar për problemet e Kosovës. Në krye të këtij sektori ishte Ajet Haxhiu (shqiptar i Kosovës i ardhur në Shqipëri në vitin 1948). Sektori drejtohej nga Ramiz Alia. Ky sektor mbështetej mbi platformën e shkruar me dorë dhe të firmosur nga E. Hoxha (origjinali nuk gjendet në arkiv, por ai material ruhet…). Thelbi i kësaj platforme politike ishte që të gjitha institucionet e shtetit shqiptar të luftonin për realizimin e objektivit politik “Kosova Republikë” brenda Federatës Jugosllave.
Në bazë të këtij orientimi politik u realizua ajo hapje e gjerë e shkëmbimeve kulturore, të asambleve, teatrove, pedagogëve etj., që shërbyen e mbajtën gjallë frymën kombëtare në Kosovë në ato vite. Ishte po ky orientim politik që dominoi në kërkesën e demonstratave të vitit 1981 në Kosovë.
Mbi bazën e kësaj platforme, në një farë mënyre, u orientuan edhe organizatat patriotike brenda e jashtë Kosovës, LPK, si dhe UÇK-ja e drejtuesit e saj.
Kjo është e vërteta historike. Çdo gjë tjetër është e qëllimshme për të dezinformuar opinionin publik.
Nëse autori i këtij shkrimi dëshiron të shtojë njohuritë për këtë periudhë, ka akoma gjallë dëshmitarë të së vërtetës.