Ish-ministri i Jashtëm i Kosovës, Enver Hoxhaj, ka kujtuar 16-vjetorin e Opinionit Këshillëdhënës të Gjykatës Ndërkombëtare të Drejtësisë (GJND), duke e cilësuar atë si një nga fitoret më të mëdha diplomatike të Kosovës, por njëkohësisht ka kritikuar gjendjen aktuale të politikës së jashtme të vendit.
Sipas Hoxhajt, 22 korriku i vitit 2010 shënoi një pikë kthese për shtetin e Kosovës dhe për konsolidimin e subjektivitetit të saj ndërkombëtar.
“Opinioni Këshillëdhënës i Gjykatës Ndërkombëtare të Drejtësisë vulosi legalitetin e pavarësisë së Kosovës dhe forcoi subjektivitetin e saj ndërkombëtar. Një fitore e madhe diplomatike që i hapi Kosovës dyert e njohjeve të reja dhe e forcoi pozitën e saj në botë”, ka shkruar Hoxhaj.
Megjithatë, ish-ministri i Jashtëm ka vlerësuar se kjo trashëgimi diplomatike është zbehur ndër vite.
“Kosova është më e izoluar se në çdo periudhë të pasluftës. Marrëdhëniet me aleatët tanë strategjikë janë dëmtuar, rruga drejt anëtarësimit në organizatat ndërkombëtare ka mbetur e bllokuar, ndërsa dialogu me Serbinë është shndërruar nga një proces për normalizim në një proces të përhershëm të menaxhimit të krizave”, ka theksuar ai.
Hoxhaj ka thënë se Opinioni i GJND-së nuk ishte fundi i procesit të shtetndërtimit të Kosovës, por baza mbi të cilën duhej të ndërtohej konsolidimi përfundimtar i shtetit.
Në fund, ai ka bërë thirrje për rikthimin e një partneriteti më të fuqishëm me aleatët perëndimorë, veçanërisht me Shtetet e Bashkuara të Amerikës dhe Bashkimin Evropian.
“Fitoret diplomatike nuk ruhen vetvetiu. Ato kërkojnë punë, vizion dhe partneritet të fortë me Shtetet e Bashkuara dhe Bashkimin Evropian. Vetëm kështu Kosova mund ta rikthejë momentumin e humbur, të fitojë njohje të reja dhe ta përmbyllë me sukses konsolidimin e saj ndërkombëtar”, ka deklaruar Hoxhaj.