Altin Krasniqi, i biri i Jakup Krasniqit, është deklaruar nga protesta mbarëpopullore e ftuar në kundërshtim të vendimit të Gjykatës Speciale kundër ish-krerëve të UÇK’së.
Krasniqi nga foltorja i ka bërë thirrje të gjithë politikanëve që t’i lënë dallimet politike anash dhe të bashkohen për një proces të drejtë gjyqësor.
“Sot jam këtu para jush jo vetëm si biri i një njeriu që po përballet me këtë padrejtësi, por si biri i këtij populli dhe si qytetar i Kosovës. Lufta jonë ka qenë për liri, luftë për një populli që për dekada ishte shtypur, përbuzur e mohuar. Ajo çfarë ndodhi në Hagë nuk mund të shihet vetëm si një çështje ndaj katër individëve. Për ne ky aktgjykim prek një histori shumë më të madhe. Prek sakrificën e çdo dëshmori, çdo të burgosuri politik, çdo të zhdukuri, të çdo fëmije që nuk arriti ta shijojë fëmijërinë në Kosovën e lirë. Sot nuk do të dorëzohemi, sepse nëse do të dorëzohemi sot, nuk do të na gjykojë vetëm e kaluara, do të na gjykojë edhe e ardhmja. Do të na pyesin fëmijët tanë: Çfarë bëtë kur historia ju vuri në bankën e të akuzuarve? Drejtësia duhet të jenë të njëjtë për të gjithë. Askush nuk duhet të dënohet mbi bazat e provave të fabrikuara. Ju bëj thirrje të gjithë shqiptarëve dhe të gjithë partive politike, le ti lëmë anash dallimet tona politike, duhet të bashkohemi dhe të kërkojmë rrugën ligjore që garant një proces të drejt, të paanshëm dhe të bazuar në prova të besueshme”, ka deklaruar Krasniqi.