Për një rast tejet të rëndë dhe tronditës ka raportuar Gazeta Sinjali, ku në fshatin Hereq të Gjakovës, një e mitur ka denoncuar babain e saj për sulm seksual.
Ngjarja është evidentuar më 1 prill 2026, pasi ankuesja është paraqitur në stacionin policor së bashku me vajzën e saj.
Viktima J.S., rreth 11-vjeçare është dëgjuar në prani të nënës dhe përfaqësueses së Qendrës për Punë Sociale, ku ka deklaruar se është sulmuar seksualisht nga i dyshuari M.S., rreth 50-vjeçar, babai i saj, gjatë kohës kur po qëndronte në shtëpinë e tij.
Ndaj të dyshuarit M. S., Gjykata Themelore në Gjakovë sot e ka caktuar masën e paraburgimit një muaj.
Sipas kërkesës së Prokurorisë, ndër të tjera ceket se me datën 1 prill 2026, i pandehuri dyshohet se ka vepruar në mënyrë të papërshtatshme dhe pa pëlqimin e të miturës , vajzës së tij, duke përdorur përmbajtje të papërshtatshme dhe duke bërë kërkesa të papranueshme. Pas incidentit, e mitura ka njoftuar prindin tjetër dhe rasti është raportuar në polici.
Në njoftimin e gjykatës thuhet se për shkak të ndjeshmërisë së rastit dhe për mbrojtjen e privatësisë dhe dinjitetit të personave të përfshirë, veçanërisht të të miturës, detajet janë kufizuar. Rasti është duke u trajtuar nga organet kompetente.
Gjyqtari i procedurës paraprake, Drilon Haraçija, pas mbajtjes së seancës dëgjimore ka vlerësuar se janë përmbushur kushtet ligjore për caktimin e masës së paraburgimit ndaj të pandehurit.
Me këtë vendim, i pandehuri M. S., do të mbahet në paraburgim në kohëzgjatje prej një (1) muaji, periudhë kjo që do të llogaritet nga data e arrestimit më 07 prill 2026 deri më 06 maj 2026.
Palët kanë të drejtë ankese ndaj këtij vendimi në Gjykatën e Apelit të Kosovës.