Një shtetas turk me leje qëndrimi në Kosovë ka përfunduar në Polici, pasi dyshohet se ka rënë viktimë e një mashtrimi kompjuterik, përmes të cilit i janë marrë mijëra dollarë në kriptovaluta dhe një pajisje me vlerë të konsiderueshme. Personi që ai e ka identifikuar si të dyshuar është larguar nga vendi i ngjarjes, ndërsa në rast janë përfshirë edhe hetuesit e krimeve kibernetike.
Burimet e Gazetës Sinjali bëjnë me dije se viktima është Musa Ozdemir, 49 vjeçar, shtetas turk me leje qëndrimi në Kosovë, i cili ka denoncuar se ka pësuar dëm prej rreth 8 mijë dollarësh në Bitcoin dhe humbjen e një pajisjeje me vlerë rreth 1,500 euro.
Rasti është raportuar të shtunën, më 31 tetor, rreth orës 19:20, në rrugën “Prekazi” në Prishtinë, ndërsa në informacionet për incidentin përmendet edhe rruga “Muharrem Fejza”.
Njësitë policore kanë dalë në lokacion dhe kanë takuar Ozdemirin, i cili është intervistuar me ndihmën e një përkthyesi zyrtar.
Sipas deklarimit të tij, nga portofoli i tij digjital (wallet) janë marrë Bitcoin me vlerë rreth 8 mijë dollarë, ndërsa i është marrë edhe një pajisje që vlerësohet rreth 1,500 euro.
Për këtë ai ka drejtuar dyshimet ndaj një shtetasi tjetër turk, të identifikuar me inicialet M.T., i cili, sipas informacioneve fillestare, ishte larguar nga lokacioni dhe nuk është gjetur nga Policia.
Denoncimi ka aktivizuar edhe njësitë e specializuara për hetimin e krimeve kibernetike, krahas hetuesve të stacionit policor, për të sqaruar mënyrën se si dyshohet se janë marrë kriptovalutat.
Pas konsultimit me Prokurorinë, rasti është iniciuar për veprat penale “Mashtrimi kompjuterik” dhe “Vjedhja”.