Kryetari i Komunës së Vushtrrisë, Ferit Idrizi, ka reaguar pas një momenti të ndodhur në tubimin e Lëvizjes Vetëvendosje në Vushtrri, ku një fëmijë recitoi një poezi në prani të kryeministrit Albin Kurti.
Përmes një postimi publik, Idrizi ka shprehur pakënaqësinë e tij lidhur me përfshirjen e fëmijëve në aktivitete me karakter politik.
“Kjo nuk është politika që meriton Vushtrria. Fëmijët nuk duhet të përdoren për qëllime politike”, ka shkruar ai.
Më tej, Idrizi u ka bërë thirrje qytetarëve që ta vlerësojnë vetë situatën, duke e shoqëruar reagimin me fjalët: “Të dashur qytetarë ju ftoj ta vlerësoni vet”.
Reagimi i tij vjen një ditë pas tubimit elektoral të LVV-së në Vushtrri, ku para të pranishmëve dhe liderit të partisë, Albin Kurti, një fëmijë recitoi një poezi në skenë.