Inspektorati Qendror i Mbikëqyrjes së Tregut, që vepron në kuadër të Ministrisë së Industrisë, Ndërmarrësisë, Tregtisë dhe Inovacionit, ka njoftuar se gjatë gjithë javës, përfshirë edhe ditën e sotme, ka zhvilluar një aksion të gjerë inspektimesh në tërë territorin e Republikës së Kosovës.
Nga ky institucion është bërë e ditur se mbetet i përkushtuar në mbrojtjen e konsumatorëve nga praktikat e padrejta tregtare dhe nga çdo veprim që bie ndesh me legjislacionin në fuqi. Po ashtu, përmes këtyre kontrolleve synohet garantimi i transparencës në treg dhe krijimi i një mjedisi të drejtë dhe të besueshëm për qytetarët.
Inspektorati ka bërë të ditur se ndaj të gjithë operatorëve ekonomikë që janë konstatuar se kanë vepruar në kundërshtim me ligjin, janë ndërmarrë masa ndëshkuese në përputhje me dispozitat ligjore në fuqi.
Tutje, është theksuar se aktivitetet inspektuese do të vazhdojnë edhe në ditët në vijim, me qëllim që të drejtat e konsumatorëve të respektohen plotësisht dhe tregu të funksionojë sipas rregullave dhe standardeve të përcaktuara.