Analisti Shenoll Muharremi ka publikuar një letër në rrjete sociale, për të cilën thotë se LDK-ja në atë qasje, do të duhej t’ia kthente VV-së.
Sipas Muharremit, LDK-ja duhet ta marrë formimin e qeverisë, dhe postin e kryeministrit.
Sipas tij, në atë letër do të theksohej se Kurti nuk mund të jetë pjesë e qeverisë në asnjë post.
Postimi:
Kështu ja kisha kthy letrën me qenë si kryesia e LDKsë:
Lidhja Demokratike e Kosovës
05/05/2025
Prishtinë
I nderuar deputet Kurti,
Ju faleminderit për letrën tuaj dhe për gatishmërinë që shprehni për të diskutuar një marrëveshje të mundshme politike ndërmjet LDK-së dhe LVV-së, në funksion të konstituimit të institucioneve të reja pas zgjedhjeve të fundit.
Siç e dini mirë, zgjedhjet që sapo i lamë pas ishin një dështim për ju dhe subjektin tuaj. Ju kërkuat 500 mijë vota, por nuk i keni fituar, keni humbur. Ajo që e quajtët “referendum” u përmbyll pa sukses. Qasja e juaj “o krejt, o asgjë” është ndëshkuar nga qytetarët, të cilët kanë vendosur për një ndryshim të qartë drejt maturisë politike, shtetndërtimit dhe stabilitetit institucional.
Sot nuk keni as votat dhe as mandatet e nevojshme për të udhëhequr vendin. Si në çdo herë tjetër kur mbeteni pa rrugëdalje, po kërkoni ndihmën e partisë më të madhe institucionale në vend, Lidhjes Demokratike të Kosovës.
A ju kujtohet gjuha polarizuese gjatë fushatës? A ju kujtohet si u sollët më 9 shkurt, kur pas humbjes fyerët të gjithë të tjerët duke i quajtur “hajvana”? Ky nuk është një sjellje që reflekton as përgjegjësi, as vetëdije për rolin e liderit në demokraci.
Megjithatë, për hir të qytetarëve të Republikës së Kosovës dhe jo për shkak të jush, e pranoj letrën tuaj dhe jam i gatshëm të shqyrtoj propozimin për bashkëqeverisje, nën këto kushte të panegociueshme:
a. Qeveria e ardhshme duhet të udhëhiqet nga Lidhja Demokratike e Kosovës. Kjo nuk është objekt negocimi.
b. Ju, z. Kurti, nuk duhet të jeni pjesë e qeverisë së ardhshme në asnjë kapacitet.
c. Lëvizja Vetëvendosje mund të udhëheqë vetëm një ministri ku është dëshmuar sukses relativ gjatë mandatit të kaluar. Për shumicën absolute të dikastereve, ka pasur dështim të theksuar.
d. Programi qeverisës i Lidhjes Demokratike të Kosovës do të jetë themeli i mandatit të ri. Ai është një program për zhvillim ekonomik, përkushtim ndaj demokracisë, respekt ndaj sektorit privat dhe forcim të institucioneve. Nuk do të ketë vend për qasje anti-biznes, retorikë përjashtuese apo eksperimente me shtetin.
Nëse jeni i gatshëm ta pranoni këtë realitet të ri politik dhe institucional, pres përgjigjen tuaj jo më larg se nesër, më 6 maj, në orën 14:00.