Ministri i Punëve të Jashtme dhe Diasporës, Glauk Konjufca, ka dënuar sulmet dhe kërcënimet e Huthëve ndaj Arabisë Saudite.
Përmes një postimi në platformën X, Konjufca i ka cilësuar si “përshkallëzim të rrezikshëm” sulmet e vazhdueshme, përfshirë tentativat për goditjen e Riadit dhe qytetit të shenjtë të Mekës.
“Sulmet e vazhdueshme të Huthive ndaj Arabisë Saudite, përfshirë tentativat për sulme ndaj Riadit dhe qytetit të shenjtë të Mekës, shënojnë një përshkallëzim të rrezikshëm, të cilin e dënojmë fuqishëm”, ka shkruar Konjufca.
Ai ka shprehur solidaritetin e Kosovës me Arabinë Saudite, duke riafirmuar mbështetjen për sovranitetin dhe integritetin territorial të Mbretërisë.
“Sulmet ndaj civilëve dhe infrastrukturës civile duhet të ndalen, ndërsa liria e lundrimit duhet të respektohet në përputhje me të drejtën ndërkombëtare”, ka deklaruar ai.