Albert Krasniqi nga organizata Demokracia Plus (D+) ka vlerësuar se procesi i konstituimit të Kuvendit nuk është përmbyllur ende, pasi nuk janë zgjedhur të pesë nënkryetarët, siç parasheh Kushtetuta.
Sipas tij, zgjedhja e kryetarit dhe e nënkryetarëve të Kuvendit është e paraparë në të njëjtin nen të Kushtetutës (neni 67.1), prandaj këto dy akte nuk mund të ndahen mes vete.
“Vetëm me zgjedhjen e Kryetarit dhe të pesë nënkryetarëve, Kuvendi konsiderohet i konstituar”, ka shkruar Krasniqi në Facebook.Ai ka theksuar se kryetari i sapozgjedhur i Kuvendit nuk gëzon kompetenca të plota për të ushtruar funksionin e tij derisa të përfundojë seanca konstituive.
“Roli i tij është thjesht teknik: të drejtojë seancën konstituive, e jo të ushtrojë funksione të tjera”, ka shtuar ai, duke rikujtuar se sipas rregullores së mëhershme të Kuvendit, këtë rol e kishte deputeti më i vjetër në moshë.
Në këtë kontekst, Krasniqi ka cilësuar si të jashtëligjshme mbledhjen e Kryesisë së thirrur nga kryetari Dimal Basha, duke theksuar se çdo vendim i tillë është i cenuar në legjitimitAi ka shtuar se asnjë prej tre nënkryetarëve të zgjedhur në mënyrë ligjore nuk duhet të marrë pjesë në këtë mbledhje.
“Procesi i konstituimit të Kuvendit duhet të rikthehet aty ku ka mbetur: tek zgjedhja e dy nënkryetarëve nga radhët e komuniteteve joshumicë. Vetëm pas përmbylljes së këtij hapi, Kuvendi mund të konsiderohet i konstituuar dhe Kryesia e tij e ligjshme për të ushtruar funksionet e parashikuara me Kushtetutë dhe Rregullore”, ka përfunduar Krasniqi.