Komuna e Prishtinës ka njoftuar se pritja e paralajmëruar për sot, më 14 maj 2025, në ora 16:00, e bendit të njohur “Gipsy Kings” tek kryetari i komunës, Përparim Rama nuk do të mbahet.
Në njoftim thuhet se ky anulim vjen si pasojë e prioritizimit të zhvillimeve të fundit që lidhen me një problem emergjent të menaxhimit të mbeturinave, për të cilin ndërmarrja “Pastrimi” ka kërkuar vëmendjen e menjëhershme të kryetarit të komunës.
Rama kishte njoftuar më herët se sot do të takohej me grupin e famshëm botëror “Gipsy Kings”.
Ndryshe, Kompania Rajonale e Mbeturinave “Pastrimi SH.A.” ka njoftuar se është e detyruar të ndërpresë ofrimin e shërbimit të grumbullimit të mbeturinave në territorin e Komunës së Prishtinës.
Në një njoftim zyrtar, KRM-ja deklaron se kjo po bëhet për shkak të mos pagesës së borxhit nga Komuna e Prishtinës, borxh ky që kap vlerën e 2.7 milionë eurove.