Padia për gjenocidin serb në Kosovë ka qenë një njëri ndër premtimet kryesore të Lëvizjes Vetëvendosje para se të vinte në pushtet.
Edhe kur Albin Kurti u bë kryeministër vazhdoi të premtojë dhe njëjtë po e bën edhe sot, një javë para fushatës për zgjedhjet e 7 qershorit
Sot në një paraqitje para gazetarëve, Kurti ishte kundërthënës në qëndrimin e tij sa i përket kësaj padie, e cila nga ekspertët vlerësohet teknikisht e pamundur të ushtrohet.
Fillimisht Kurti tha se janë duke punuar në këtë padi dhe posa të ketë stabilitet institucional dhe të kryhen të gjitha përgatitjet do të përfundojë.
“Ne jemi duke punuar në padinë për gjenocid kundër Serbisë dhe i kemi ekspertët që punojnë në këtë aspekt. Këtu më së shumti ndihmën po e jep Instituti kundër krimeve të kryera gjatë luftës. Në momentin që ta kemi stabilitetin institucional dhe t’i kemi të kryera këto përgatitje, do ta bëjmë edhe atë.”
Në anën tjetër, ai vet e pranon se meqë Kosova nuk është anëtare e Organizatës së Kombeve të Bashkuara dhe rrjedhimisht s’ka të drejtë të bëjë padi për gjenocid.
Por, sipas ekspertëve të cilëve iu referua, ekzistojnë mundësi që një ditë mund të ushtrohet padia.
“Nuk do të jetë e lehtë për Kosovën për shkak të pozitës sonë ndërkombëtare, me faktin që s’jemi anëtar të Organizatës së Kombeve të Bashkuara, por në bazë të ekspertëve megjithatë ekzistojnë mundësi qe ne një ditë do ta bëjmë këtë padi.”