Gjermania mund të ketë për herë të parë një grua në krye të shtetit, pasi kandidatja Ilse Aigner po shihet si favoritja kryesore për postin e presidentes së vendit.
61-vjeçarja nga Bavaria është propozuar nga kancelari gjerman, Friedrich Merz, si kandidate për presidente, duke hapur rrugën për një ndryshim historik në politikën gjermane.
Që nga përfundimi i Luftës së Dytë Botërore, Gjermania ka pasur 12 presidentë dhe të gjithë kanë qenë burra. Nëse zgjidhet në janar, Aigner do të pasojë Frank-Walter Steinmeierin, duke u bërë gruaja e parë që merr këtë detyrë.
Kandidatura e saj ka marrë mbështetjen e CDU-së së Merz, partnerëve socialdemokratë në qeveri, si dhe të partisë së të Gjelbërve në opozitë. Kjo e bën zgjedhjen e saj shumë të mundshme.
Merz ka deklaruar se “kishte ardhur koha” që një grua të merrte postin e presidentes, i cili, ndonëse kryesisht ceremonial, përfaqëson funksionin më të lartë shtetëror në Gjermani.
Aigner është shndërruar edhe në temë të diskutimeve jashtë qarqeve politike. Shkrimtari dhe moderatori televiziv Jörg Thadeusz ka shprehur mbështetjen për kandidaturën e saj në një mënyrë të pazakontë, duke bërë tatuazh emrin “Ilse” në krahun e majtë.
Fotot e tij duke treguar tatuazhin në televizion kanë tërhequr vëmendjen e mediave gjermane, të cilat kanë nisur ta quajnë këtë entuziazëm “vala Aigner”.
Kështu, Gjermania mund të jetë pranë një momenti historik, me një grua që për herë të parë pritet të marrë drejtimin e postit më të lartë shtetëror të vendit.