Diplomati nga Peja, Niq Krasniqi, i cili për rreth 30 vjet ka vepruar në Austri duke përfaqësuar dhe mbështetur mërgatën shqiptare në mënyrë vullnetare, i është bashkuar listës së Lidhjes Demokratike të Kosovës (LDK) për zgjedhjet parlamentare të 7 qershorit.
Krasniqi kandidon me numrin 98, një numër që, sipas tij, bart simbolikë të veçantë dhe lidhet me ndryshimet e mëdha historike që nisën në vitin 1998 për Kosovën.
Gjatë veprimtarisë së tij në Austri, ai ka qenë i angazhuar në diplomacinë kulturore dhe parlamentare, në çështje të integrimit, arsimit dhe përfaqësimit të komunitetit shqiptar. Për një periudhë ka ushtruar edhe detyrën e menaxherit të integrimit në institucionet austriake.
“Jam Niq Krasniqi, i lindur në Pejë. Për 30 vjet kam jetuar në Kosovë dhe po aq në Vjenë. Shkollimin fillor dhe të mesëm e kam përfunduar në Kosovë, ndërsa në vitin 1996 u shpërngula në Austri për të bërë nostrifikimin e diplomës. Gjatë këtyre viteve kam qenë aktiv në diplomacinë kulturore dhe parlamentare, kam punuar në fushën e integrimit dhe kam fituar përvojë edhe në sektorin e arsimit”, tha Krasniqi.
Ai thekson se pas afro tri dekadash angazhimi vullnetar në mbrojtjen dhe përfaqësimin e interesave të mërgatës shqiptare në Austri, tani ka vendosur që kontributin e tij ta japë në mënyrë institucionale në Kosovë.
“Sot jam pjesë e listës së LDK-së me numrin 98. Ashtu siç viti 1998 shënoi fillimin e një ndryshimi të madh që solli lirinë dhe demokracinë, synimi im është që përmes angazhimit politik të kontribuoj në mbrojtjen e demokracisë dhe në ndryshimet që i nevojiten vendit”, deklaroi ai.