Para jo shumë vitesh e quante Kadri Veselin hero, kurse në këto zgjedhje LDK ia ka hapur dyert sërish që të kandidojë për deputet.
Është fjala për Armend Ibrahimin, ish kryetar i forumit rinor të LDK-së në kohën kur kjo parti drejtohej nga Isa Mustafa.
Por edhe Ibrahimi pas pakënaqësive të brendshme në vitin 2017 kishte braktisur LDK-në për t’iu bashkuar PDK-së, që atë kohë drejtohej nga Kadri Veseli.
Madje në momentin e aderimit në PDK, Ibrahimi nuk kishte hezituar që t’i thurte lavde në piedestal Veselit, duke e quajtur hero.
Armend Ibrahimi kishte braktisur LDK-në kohë më parë se sa Vjosa Osmani, por duket se kanë vendosur rikthimin në të njëjtën kohë.
Ai në këto zgjedhje kandidon në listën e LDK-së ku është edhe Vjosa Osmani.
Siç mëson Veriu.info ai është emër i propozuar nga Vjosa Osmani në këtë listë.
Më poshtë ju sjellim deklarimin e plotë të Ibrahimit kur “ekzaltohej” nga aderimi dhe takimi me Kadri Veselin:
Të dashur miq – Faleminderit për përkrahjen e jashtëzakonshme
Të gjithë ata të cilët i kuptojnë zhvillimet politike – e kuptojnë se ky është projekt i rindertimit të unitetit nacional shtetëror dhe i pajtimit të brendshëm politik – që përmes partive të punojmë për Kosovën dhe jo anasjelltas; në këtë mes z. Veseli është hero i përmbylljes së fazës së parë të tranzicionit demokratik në Kosovë; andaj me shumë deshirë e pranova ftesën e tij për angazhim të përbashkët për Kosovën – Atdheun tonë.
Deshiroj t’i falënderoj të gjithë ata të cilët me zemër më dërguan mijëra mesazhe të sinqerta, përkrahëse e motivuese, në prag të fillimit të ri për Kosovën; Unë do ta ruaj me fanatizëm lidhjen tonë dhe do të jap maksimumin tim që të garantoj hapsirën e merituar për secilin prej jush në ekipin tonë të ri. Besoj në suksese të përbashkëta; kam shumë energji dhe vullnet, që në vend të përçarjes të promovojmë bashkëpunimin dhe t’i trajtojmë pa kompromis çështjet e interesit nacional shtetëror. Ju falenderoj për përkrahjen dhe për lutjet tuaja.
Me ndihmën e Zotit do të i’a kthejmë Popullit shpresën – së bashku! #FillimiRi