Kryetari i Nismës Socialdemokrate, Fatmir Limaj, është deklaruar për medie para mbajtjes së seancës së ardhshme për konstituimin e Kuvendit të Kosovës, me ç’rast tha se zgjidhja e ngërçit aktual politik mund të arrihet vetëm përmes dialogut dhe marrëveshjeve ndërpartiake, raporton Ekonomia Online.
Sipas tij, është e nevojshme një marrëveshje politike dhe secila palë duhet të marrë përgjegjësinë që i takon. Ai theksoi gjithashtu se aktualisht nuk ka ndonjë aktor tjetër politik në skenë përveç atyre që janë tashmë të përfshirë.
“Një marrëveshje politike është e domosdoshme. Mendoj se secili duhet t’i thirrë përgjegjësisë së vet. Forca të tjera politike nuk ka – këto janë që janë,” tha Limaj para gazetarëve.
Limaj nënvizoi se zgjidhja mund të vijë vetëm përmes negociatave ndërmjet forcave politike dhe shtoi se Nisma nuk ka marrë asnjë ftesë zyrtare për të dhënë propozime në lidhje me procesin e konstituimit të Kuvendit.
