Kryetari i Lidhjes Demokratike të Kosovës, Lumir Abdixhiku ka pritur në takim veprimtarin e shquar shqiptaro-amerikan, Harry Bajraktin.
I pari i LDK-së thotë se Bajraktarit i shprehu mirënjohje për kontributin e jashtëzakonshëm në afirmimin e çështjes sonë kombëtare për lirinë, pavarësinë dhe shtetndërtimin e Republikës së Kosovës.
“Sot, në Selinë Qendrore të Lidhjes Demokratike të Kosovës, pata kënaqësinë të pres veprimtarin e shquar shqiptaro-amerikan, Harry Bajraktarin; një nga zërat më të fuqishëm të Kosovës në Shtetet e Bashkuara të Amerikës. Shpreha mirënjohjen time të thellë për kontributin e jashtëzakonshëm të z. Bajraktari në afirmimin e çështjes sonë kombëtare për lirinë, pavarësinë dhe shtetndërtimin e Republikës së Kosovës; për rolin e tij të pazëvendësueshëm në forcimin e pozitës së vendit tonë në arenën ndërkombëtare; dhe për zërin e tij të fuqishëm, i cili në kohët më të vështira dhe vendimtare ka përfaqësuar me dinjitet të drejtat e popullit të Kosovës para institucioneve amerikane”.
Më tej, ai shton se Bajraktari ka bashkëpunuar ngushtë me Presidentin Rugova, duke e artikuluar me kompetencë dhe besnikëri kauzën e vendit tonë para politikëbërësve amerikanë, në një periudhë kur Kosova kishte nevojë jetike për miq e aleatë.
“Si mbështetës i palëkundur i Kosovës qysh në vitet e hershme, ai ka bashkëpunuar ngushtë me Presidentin Rugova, duke e artikuluar me kompetencë dhe besnikëri kauzën e vendit tonë para politikëbërësve amerikanë, në një periudhë kur Kosova kishte nevojë jetike për miq e aleatë. E falënderoj Harry Bajraktarin për gjithçka që ka bërë e vazhdon të bëjë për Kosovën. Ai mbetet mik i madh, zë i fuqishëm dhe mbështetës i paepur i vendit tonë”, përfundoi kreu i LDK-së.
