Lura Pollozhani, e ftuar në emisionin “Forum” në DTV Media, është pajtuar me analistin politik Visar Ymeri sa i përket rolit të lëvizjeve sociale, duke theksuar se ato nuk kanë për detyrë të ofrojnë menjëherë zgjidhje konkrete, por të sinjalizojnë se në shoqëri diçka nuk po funksionon.
Sipas Pollozhanit, lëvizjet sociale nuk janë domosdoshmërisht gjithëpërfshirëse dhe jo të gjithë pajtohen me arsyet apo kërkesat e tyre. Megjithatë, ato mund të përfaqësojnë një sinjal të fuqishëm për ekzistencën e problemeve ekonomike dhe shoqërore.
“Lëvizjet sociale janë sinjal se diçka nuk po shkon. Tani, a dakordohemi të gjithë me sinjalin? Jo gjithmonë, sepse lëvizjet nuk janë gjithmonë përjashtuese. Nuk ka gjithmonë dakordim me atë se për çfarë është lëvizja sociale, por simbolizon sinjal të fortë të një problemi ekonomik e shoqëror”, është shprehur ajo.
Pollozhani ka theksuar se barra për të gjetur zgjidhje dhe për të marrë vendime nuk duhet t’u ngarkohet vetë lëvizjeve sociale, pasi roli i tyre kryesor është të bëjnë të dukshëm problemin.
Ajo nuk është pajtuar as me interpretimin e protestave si formë argëtimi, duke theksuar se dalja e qytetarëve në rrugë është një mënyrë për t’u bërë faktor në shtet dhe për të shprehur pakënaqësinë ndaj gjendjes ekzistuese.
Sipas saj, protestat janë një formë e rëndësishme e veprimit qytetar, përmes së cilës shoqëria jep sinjal të qartë se kërkon ndryshim.