Policia e Kosovës ka paralajmëruar qytetarët për një valë e-mailesh mashtruese që po qarkullojnë në emër të Drejtorit të Përgjithshëm të Policisë, Gazmend Hoxha.
Sipas njoftimit, disa persona kanë pranuar mesazhe elektronike që paraqiten si komunikim zyrtar nga institucionet e sigurisë, duke pretenduar se lidhen me një urdhër gjykate dhe duke kërkuar reagim të menjëhershëm nga marrësit.
Policia ka bërë të ditur se këto mesazhe nuk kanë origjinë zyrtare dhe se rasti po hetohet për të zbuluar personat përgjegjës për shpërndarjen e tyre.
Qytetarët janë këshilluar që të mos hapin bashkëngjitjet e këtyre e-maileve, të mos klikojnë në lidhje të dyshimta dhe të mos ndajnë të dhëna personale apo informacione bankare.
Autoritetet kanë kërkuar që çdo person që pranon mesazhe të tilla t’i fshijë ato, t’i raportojë tek institucionet përkatëse dhe të kontaktojë bankën në rast se ka ndarë të dhëna financiare.
Policia ka theksuar se komunikimet zyrtare nuk kërkojnë pagesa përmes SMS-ve apo dhënie të informacioneve sensitive përmes kanaleve të pasigurta.
