Profesori universitar vlerëson figurën e Malokut si njeri të guximshëm që punoi me përkushtim për lirinë dhe pavarësinë e Kosovës.
Profesori universitar dhe një nga themeluesit e Lidhjes Demokratike të Kosovës, Milazim Krasniqi, ka vlerësuar lart figurën e Enver Malokut, duke e cilësuar atë si njeri të mirë, gazetar të guximshëm, politikan të sinqertë dhe patriot të devotshëm.
Sipas Krasniqit, Maloku ka punuar me pasion të madh për pavarësinë dhe lirinë e Kosovës, me një përkushtim që rrallë shihet. Ai thekson se Maloku vepronte me energjinë e një njeriu vizionar, sikur e gjithë përgjegjësia për vendin të ishte vetëm mbi supet e tij.
“Enver Maloku nuk ishte i nxituar, por i përkushtuar për të kryer punë edhe për ata që rrinin anash apo fshiheshin”, ka deklaruar Krasniqi, duke nënvizuar sakrificën dhe angazhimin e tij të vazhdueshëm.
Ai shton se koha do të dëshmojë kontributin e madh që Maloku i ka dhënë Kosovës, njëkohësisht duke reflektuar se sa pak, sipas tij, Kosova ka bërë për ta vlerësuar figurën dhe veprën e tij.