Ministri në detyrë i Bujqësisë, Faton Peci, është duke u intervistuar nga Krimet Ekonomike, pas aksionit të Policisë të mbajtur të martën për çështjen e tenderit për funksionalizimin e objekteve për përpunimin e produkteve shtazore.
Zëdhënësja e Prokurorisë Speciale, Arbnora Luta, e ka konfirmuar për Ekonomia Online se Peci po merret në pyetje si pjesë e hetimeve që pasuan bastisjet e sotme të Policisë së Kosovës në disa institucione shtetërore dhe private.
“Po, mund të konfirmoj se ministri në detyrë i Bujqësisë është duke u intervistuar në kuadër të këtij rasti që është në hetim nga Prokuroria Speciale,” tha Luta.
Hetimet lidhen me një projekt për ndërtimin e një fabrike për mbetje shtazore, ku dyshohet për keqpërdorim të detyrës zyrtare dhe shpërdorim të fondeve publike. Bastisjet janë zhvilluar në Ministrinë e Bujqësisë, Agjencinë për Zhvillimin e Bujqësisë, Agjencinë e Veterinarisë dhe në lokacionin e kompanisë që ka përfituar nga ky projekt.
Gjatë ditës, prokurori i Prokurorisë Speciale, Admir Shala, konfirmoi për Ekonomia Online se është duke u zhvilluar një hetim lidhur me dhënien me qira të fabrikës për përpunimin e mbetjeve shtazore.
Ai tha se bastisjet po kryhen në bazë të urdhrit të Gjykatës Themelore të Prishtinës, me kërkesë të Prokurorisë Speciale dhe me autorizimin e saj.
Sipas Shalës, bastisjet po zhvillohen në katër lokacione: Ministrinë e Bujqësisë, Agjencinë për Zhvillimin e Bujqësisë, Agjencinë e Veterinarisë, si dhe në lokacionin e kompanisë përfituese.
“Prokuroria Speciale ka filluar një hetim lidhur me dhënien në shfrytëzim të Fabrikës për përpunimin e produkteve shtazore. Hetimi është duke u zhvilluar lidhur me dyshimet e dhënies me qira të kësaj fabrike. Jemi në fazën e hetimit, jemi duke zhvilluar bastisjen dhe kontrollet në bazë të urdhrit të gjyqtarit të procedurës paraprake të Gjykatës Themelore të Prishtinës me kërkesë të Prokurorisë Speciale. Po ashtu me autorizimin tonë, policia me ne është duke ndërmarrë veprimet e nevojshme me qëllim të zbardhjes së rastit konkret. Bastisjet janë duke u zhvilluar në katër lokacione: Ministri të Bujqësisë, Agjencia për Zhvillim Bujqësor, Agjencia e Veterinarisë dhe lokacioni i vetenerinarisë ë kompanisë përfituese”, tha ai.