Eksperti i sigurisë Drizdan Shala ka paralajmëruar për sulme të reja të mundshme në drejtim të Kosovës, të organizuar nga Millan Radoiçiq, kryeterroristi i sulmit të Banjskës. Ne nje deklarim per TV ‘Klan Kosova’, Shala deklaroi qe mosdorëzimi i Radoiçiqit para drejtësisë në Kosovë paraqet rrezik për sulme të reja.
Tash pasi Gjykata Themelore në Prishtinë ka lëshuar urdhëarrest ndaj tij dhe 19 serbëve të tjerë për veprën penale ‘Krime lufte kundër popullatës civile”, Shala thotë se kryeterroristi mund të jetë i aftë për gjithçka.
Madje eksperti ka paralajmëruar edhe për sulme të reja në Kosovë.
“Mund të kemi inskenime të ndryshme në drejtim të Republikës së Kosovës, sepse sa më shumë që ne bëjmë presion në drejtim të Radoiciqit për ta arrestuar atë, ai mund të vijë në një situatë që të kryejë veprime në drejtim të komunitetit serb në Kosovë e më pastaj ato veprime t’i vishen institucioneve të Republikës së Kosovës”
Sipas tij, Radoiçiq ka mbështetjen e presidentit serb Aleksandar Vuçiq dhe pikërisht aty është bërthama kryesore e lëvizjeve kriminale të tij.
“Jo vetëm në raport Kosovë-Serbi, por mos harroni që Milan Radoiciq ka shtrirje nëpër institucionet serbe dhe ai mund të përdoret nga Aleksandar Vuçiqi për të kryer veprime të ndryshme kriminale edhe në rajon”. Shala po ashtu shtoj qe Milan Radoiçiq mbrohet fizikisht nga Agjencia Ushtarake e Sigurisë së Serbisë (VBA), një organ që vepron nën kontroll të drejtpërdrejtë të presidentit serb Vuçiq.