Deputetja e zgjedhur e Partisë Demokratike të Kosovës (PDK), Ariana Musliu-Shoshi, ka kritikuar Qeverinë e kryeministrit Albin Kurti për, siç është shprehur ajo, dështime në politikën e jashtme dhe dëmtim të raporteve me Shtetet e Bashkuara të Amerikës.
Sipas Musliu-Shoshit, Serbia po nis Dialogun Strategjik me SHBA-në, ndërsa Kosovës po i vendosen kushte për të filluar një proces të ngjashëm.
Ajo ka vlerësuar se kjo situatë është pasojë e drejtpërdrejtë e një qeverisjeje që, sipas saj, ka dëmtuar besimin me aleatin më të rëndësishëm strategjik të Kosovës dhe e ka çuar vendin drejt izolimit ndërkombëtar.
Musliu-Shoshi ka kërkuar që Qeveria të marrë përgjegjësi për gjendjen aktuale dhe të angazhohet për rikthimin e besimit me Shtetet e Bashkuara dhe partnerët euroatlantikë.
Musliu-Shoshi ka theksuar se interesi i Kosovës duhet të vendoset gjithmonë mbi interesat partiake.