Deputetja e Partisë Demokratike të Kosovës, Ariana Musliu-Shoshi, ka reaguar ashpër pas vendimit për mbylljen e përkohshme të qumështores “Vita”, duke e cilësuar këtë si një sulm të qëllimshëm dhe pasojë të drejtpërdrejtë të politikave të qeverisë së Albin Kurtit.
Përmes një reagimi në Facebook, Musliu-Shoshi ka theksuar se ky veprim prek zinxhirin kryesor të ekonomisë lokale, duke rrezikuar punëtorët dhe fermerët vendorë.
“Dëmi ndaj ekonomisë vendore nuk është rastësi. Është pasojë e drejtpërdrejtë e mënyrës së qeverisjes së Albin Kurtit dhe vartësve të tij. Mbyllja e VITA-s është goditje ndaj fermerit, punëtorit dhe prodhimit vendor”, ka shkruar deputetja e PDK-së.
Ajo ka akuzuar drejtpërdrejt institucionet shtetërore se në vend që të ofrojnë mbrojtje dhe stabilitet për bizneset, po krijojnë pasiguri të madhe ekonomike për mijëra familje që varen nga kjo industri.
“Institucionet që duhej ta mbronin ekonominë e Kosovës, sot mbajnë përgjegjësi për humbjen e vendeve të punës dhe pasigurinë e mijëra familjeve. Kur pushteti godet prodhuesin vendor, çmimin e paguan çdo qytetar i Kosovës”, shkroi Musliu-Shoshi.