Kandidati i PDK-së për deputet, Nasret Hajrizi, ka kritikuar qeverinë aktuale për, siç tha ai, mungesë rezultatesh konkrete dhe përkeqësim të gjendjes ekonomike në vend.
Përmes një reagimi publik, Hajrizi deklaroi se qeveria ka ndërtuar “një narrativë suksesi”, por sipas tij realiteti në terren tregon një situatë krejt tjetër për qytetarët.
“Ekonomia mbetet e brishtë, çmimet janë rritur, ndërsa qytetarët përballen çdo ditë me pasiguri dhe mungesë perspektive”, u shpreh ai.
Hajrizi tha se premtimet për zhvillim dhe mirëqenie janë zëvendësuar me “arsyetime, propagandë dhe mungesë përgjegjësie”, duke shtuar se në vend të reformave të thella ka pasur vendime të vonuara dhe improvizim në sektorë kyç si energjia dhe ekonomia.
Ai theksoi se qeverisja duhet të matet me rezultate konkrete dhe jo me deklarata politike.
“Kosova nuk ka nevojë për propagandë dhe rrëna politike. Ka nevojë për lidership real, përgjegjësi dhe vendime që prodhojnë zhvillim”, deklaroi kandidati i PDK-së për deputet.
Në fund, Hajrizi potencoi se qytetarët jetojnë me realitetin e përditshëm dhe jo me deklarata politike.